مارولا في الجمعة 21 سبتمبر 2007, 3:39 pm
[b]إلي البابا كيرلس
[center]علي طريق الجلجثه مشيت خطاك
شايل صليبك ..رامي العالم وراك
عشت زاهد ف الحياه وفي المغريات
حاطط الغربه هدف ليك من صباك
.............
عشت طاهر عشت حاطط ليك هدف
عشت محافظ ع الجواهر م التلف
عشت ماسك في الفضيله بكل امانه
وهو مين يبدل جواهره بالصدف ؟!
...............
من وانت لسه بتحبي في دنيا الحياه
وكل لحظه عشتها في صوم وف صلاه
لما جاتلك لحظتك وبديت طريقك
اللي انت راسمله وقلبك إشتهاه
.................
وابتدت رحله جديده في التاريخ
الإيمان بدون زعاق وبدون صريخ
وابتدوا يتجمعوا حولك ولادك
والأمل رجع.. وكان قرب يشيخ
.................
وابتدينا نعرف ايه معني الصلاة
ورجع من تاني عهد المعجزات
والبتول ظهرت بنورها في الزتون
والقديسين صلوا معاك في القداسات
..............
كام مريض وكام أسير وكام جريح
جالك وكل مناه بلمسه يستريح
وياما ناس خاطيه بنظره من عينيك
آمنوا وتابوا وعادوا ل حضن المسيح
..................
حتي بعد رحيلك إنت مش ناسينا
لما بنطلبك تجينا وتواسينا
والمريض تشفيه وكل الناس شهود
ياحبيب يسوع والعدرا وماري مينا
